سكريبت

 إيهاب الدسوقي واحد من الضربشمساويين التقال قوي في الدستور ..
  طبعا تحت قياده المايسترو الكبير خالد كساب ..
  والمايسترو الأكبر ابراهيم عيسى .

الحب على عتبه العشم 

المشهد الأول :

" يظهر بدر في حجرته و يتحدث في الهاتف "
بدر : قوليلي يا سالي .. أجيب بلاط شقتنا مزايكو ولا سيراميك ؟!
سالي : المزايكو أوفر .. و أهو كله بينداس عليه .
بدر : " بصوت عالي "  لا ما يهمكيش الفلوس .. دا أنا فييس حقيقي و اللي في جيبي في إيدي .
الأب " من الخارج " فاتوره التليفون 500 جنيه يا بغل .
بدر : " يغلق السكه بسرعه " مش أنا اللي طالب !!

المشهد التاني :

"يضع بدر كارت للاتصالات في كابينه عموميه فتظهر تعليمات  " باقي من رصيدك أربعه قروش تكفي لثلاث كلمات و حرف جر .
بدر : " يطلب رقما " سالي أنا بكلمك من ...  " ينقطع الاتصال "
انتهى رصيدك .. من فضلك اسحب الكارت و مزقه أربع تربع .. أو ابتعد قليلا ، فسوف  تنفجر الكابينه أوتوماتيكيا ..

المشهد التالت :

" يظهر بدر أمام محل سنترال مغلق بعد منتصف الليل  .. يلتفت يمينا و يسارا ثم يخرج من جيبه عده مفاتيح محاولا اختراق القفل "
بدر  : " يشعر بيد تربت على كتفه فيظهر طفل صغير يتأبط كره قدم " إيه اللي مصحيك لدلوقتي يا حبيبي ؟
الطفل : عامنفخ الكوغه .
بدر : إنت بقك مقلوب ولا ألدغ في عشرين حرف ؟
الطفل : عايز أمفخ الكوغه .
بدر : غور ياد من هنا بدل ما أخبطك أخليك تتكلم بالتشكيل .

المشهد الرابع :

" يخترق بدر القفل و يدخل السنترال "
بدر : " يطلب رقما " أيوه يا سالي .. ما كملناش كلامنا .. عايزه السخان غاز و لا كهربه ؟
" يفاجأ برجل يفتح الدكان ويدخل "
الرجل : عايز أكلم أختي زينب في سوريا .. ابنها بلع تي شيرت .
بدر : ابن خالتي برضه بلع جنيه فضه ، بس نزل خمسه و تسعين قرش .
الرجل : كده يبقى فاضل شلن .
بدر : ما كانشي فيه فكه نزل بداله مشط كبريت .

المشهد الخامس :

" يظهر بدر و هو يبحدث مع سالي ، و تظهر الكبائن كلها مشغوله بالزبائن .
صوت من كابينه : هترجع إمتى م السعوديه يا بو أيمن ، بقالك سبع سنين بتعمل عمره .

المشهد الأخير :

" في قسم البوليس يظهر بدر أمام الضابط "
بدر : " للضابط " حضرتك القانون بيديني حق مكالمه .. ممكن اتصل بسالي ؟!!

قطع .