سلامه

معرفش ليه تنّحت للدنيا كده..
فجأة لقيتني مسكون بالملل..
لا عندي رغبة في البكا ولا في الكلام ولا عارف أنام..
ولا حتى بسأل إيه ده إيه و أخرتها إيه و إيه العمل ..
و أخاف أقول لأي حد..
أحسن يقوم يقلبها جد..
أو حد صاحبي ينزعج..
يمد إيده في قلبه من باب الكرم..
عشان يشاركني الألم..
أو يستلفلي من لئيم حبّة أمل..
حالة كده .. معرفش إيه.
حالة كده ملهاش معالم..
ساعات تزورني في الربيع .. في الحر .. و في عز الشتا..
و تجيب حاجات لا فيها روح ولا ميتة..
لكني برجع منّها بعد السكات .. فاهم شوية في اللي فات..
حاسس أوي بحزن الصحاب .. محظوظ أنا..
ساعات أشاور ينفتحلي ألف باب..
لكنّي بغلط في الحساب..
معرفش ليه.

ماشي يا بني آدمين

بعد التشجيع الجامد اللي باين من كم التعليقات على افتتاحيه المدونه "0"
نكتب تاني ..
انا ما كنتش منتظر حاجه تانيه على أي حال..
أنا كاتب المدونه دي لنفسي..
عشان تبقى صاحبتي..
لما أكون مش لاقي حد أكلمه..
أكلمها.

ليه كده

بسم الله الرحمن الرحيم
=...................=  
النهارده و مع بدايه عامي السابع والعشرين دخلت عالم التدوين..
خطوه إتأخرت كتييييير مع إني كنت ناوي عليها من زمان ..
المشكله كانت في اسمها..
المدونه..
فكرت في أسامي كتير
كوكو الضعيف..
و بعدين..
ضربه شمس..
..
..
و بعدين الدي اس ال انفصل..
و انفصلت عن النت كله..
وكبَّرت..
رجع النت ..
بعد ما طلع عيني مع إي جي نت..
قلت لنفسي إلحق اعمل المدونه..
إلحق القطر..
ليه كده..

هعمل بيها ايه..
هعمل فيها ايه..
مش هحدد لها خط معين..
مش سياسيه..
مش دينيه..
ولا شخصيه..
خلينا نقول عليها كوكتيل..
مهلبيه.